Turshi patëllxhani - Receta me foto hap pas hapi

Turshi patëllxhani

Një nga turshitë e mia të preferuara që të mundon pak,por ja vlen mundimi kur i shijon.

patellxhan-turshi-receta-dimerore-zahire

Përbërësit:

  • Patëllxhan
  • Vaj ulliri
  • Kripë kokërrtrashë
  • Uthull të bardhë
  • Gjethe dafine
  • Majdanoz
  • Rigon
  • Piper
  • Speca djegës ( sipas dëshirës)

Përgatitja:

Fillimisht pastrojmë e lajmë mirë patëllxhanet. I thajmë me pecetë dhe i presim në feta. Marrim një kullonjëse perimesh/makaronash e fillojmë të vendosim fetat e patëllxhanit. Mbi çdo fetë do hedhim kripë të trashë sipër ( gati një lugë gjelle kripë mbi çdo fetë).

Vazhdojmë në këtë mënyrë, (pra duke alternuar fetat e patëllxhanit me kripën), derisa të mbarojmë të gjitha. Në fund vendosim mbi patëllxhanet një peshë sipër dhe i lemë kështu përreth 12 orë,( kujdes vendosni një enë poshtë kullonjëses sepse kullon gjithë uji i patëllxhanit).

Pasi kanë kaluar 12 orë marrim patëllxhanet dhe i shpëlajmë me uthull duke i hequr kripën e tepërt. Pastaj në një pecetë vendosim feta patëllxhani dhe i shtrydhim mirë ( sikur shtrydhim rrobat kur i lajmë). Kështu ikën gjithë uthulla. I vendosim mbi një mbulesë tavoline që të thithë uthullën e mbetur.

Marrim një enë të madhe dhe hedhim patëllxhanet, vaj ulliri,piper,majadanoz,rigon e specat djegës. I përziejmë mirë.

Vendosim fetat e patëllxhanit në vazo një e nga një, ( vazot duhet të jenë të dizinfektuara dhe të thara). Vazhdojmë kështu derisa ti mbarojmë të gjitha. I shtypim fort me dorë nga sipër. Në fund fare i mbushim me vaj ulliri. Mbyllim kapakun dhe i lemë në një vend të freskët. Pasi kane kaluar 24 orë i shikojmë nëse kanë nevojë akoma për vaj ulliri ( duhet të jenë mbuluar me vaj deri në grykën e vazos). Shtojmë vaj ulliri nëse është e nevojshme dhe pastaj mbyllim fort hermetikisht vazot me kapak. Turshitë i ruajmë në një vend të freskët dhe mundësisht mos ti kapi drita.

Konsumojmë turshitë të shoqëruara me një copëz buke të ngrohtë e pak djathë të bardhë…

Ju bëftë mirë!

1 Like

Kete recete e gjeni edhe ne INSTAGRAM :smiling_face_with_three_hearts: na ndiqni